کابل: (ایم این این) افغانستان کے دارالحکومت کابل میں شادی کی ایک تقریب میں طاقتور دھماکے میں ہفتہ کی شب کم از کم 63 افراد کی موت ہو گئی اور 182 سے زائد افراد زخمی ہو گئے ۔
عینی شاہدین نے میڈیا کو بتایا کہ ایک خود کش بمبار نے شادی کی تقریب میں خود کو دھماکہ خیز مواد سے اڑا دیا۔
غیر ملکی خبر رساں ادارے اے ایف پی کی رپورٹ کے مطابق دھماکا ہفتے کی رات کو مغربی کابل کے شادی ہال میں جاری ایک شادی کی تقریب کے دوران پیش آیا۔
خیال رہے کہ واشنگٹن اور طالبان افغانستان میں امریکی فوجیوں کی موجودگی کو ختم کرنے کے لیے معاہدے کو حتمی شکل دینے کے لیے آخری مراحل میں ہیں۔
طالبان نے حملے میں کسی بھی طرح سے ملوث ہونے کی تردید کردی۔
وزارت داخلہ کے ترجمان نصرت رحیمی کا کہنا تھا کہ ہلاکتوں کی تعداد کابل میں حالیہ مہینوں میں ہونے والے حملوں سے کہیں زیادہ ہے۔
ان کا کہنا تھا کہ زخمیوں میں خواتین اور بچے بھی شامل ہیں۔
یہ دھماکہ صرف دس روز قبل کابل پولیس سٹیشن کے باہر ہونے والے بم دھماکے کے بعد ہوا ہے جس میں کم از کم 14 افراد ہلاک اور 150 زخمی ہو گئے تھے۔ اس حملے کی ذمہ داری طالبان نے قبول کی تھی۔
واضح رہے کہ افغانستان کے علاوہ پاکستان میں بھی اکثر اوقات شیعہ و ہزارہ برادری کو نشانہ بنایا جاتا ہے۔
واضح رہے کہ افغانستان میں شادی کی تقریب میں سو یا اکثر ہزاروں مہمانوں کو مدعو کیا جاتا ہے جو بڑے بڑے شادی ہالوں میں منعقد کی جاتی ہیں ۔
شادی کی تقریب میں موجود محمد فرہاگ کا کہنا تھا کہ وہ خواتین کے لیے مختص جگہ پر تھے کہ انہوں نے مردوں کی جگہ سے دھماکے کی آواز سنی۔
ان کا کہنا تھا کہ ‘دھماکے کے فوری بعد ہر کوئی روتے ہوئے بھاگتا ہوا نظر آیا۔
انہوں نے کہا کہ ’20 منٹ تک شادی ہال میں دھواں بھرا رہا، مردوں کی جگہ سے تقریباً تمام افراد ہلاک یا زخمی ہوئے، دھماکے کے 2 گھنٹے بعد بھی شادی ہال سے لاشیں نکالی جارہی تھیں۔
